Foto

Azərbaycan Dövlət Uşaq Filarmoniyası

Kollektİvlər

Musiqili Uşaq teatrı

Azərbaycan Dövlət Uşaq Filarmoniyasının tərkibində 2013-cü ildən öz fəaliyyətinə başlayıb. Bu illər ərzində uşaqların ifasında bir çox nağıl tamaşalar təqdim olunmuşdur. Bunlardan "Cırtdanın nağılı", "Bremen musiqiçilərinin yeni il səyahəti", “Qoğalın sərgüzəştləri”, “Buratino”, “Qırmızı papaq”, “Yeddi keçi balası” tamaşalarını qeyd etmək olar. Teatr studiyası uşaqların dünya görüşünün inkişafında, teatr estetikasının dərk edilməsində ən önəmli vasitələrdən biridir və həmçinin uşaqların teatra sevgisini aşılayır.

Rəqs Ansamblı

Dövlət Uşaq Filarmoniyası yarandığı gündən bu günə qədər fəaliyyət göstərən "Rəqs ansamblı" uşaqların bədii-estetik zövqünün formalaşmasında yaxından iştirak edir. Milli rəqslərə məxsus kolorit, dünya xalqlarının rəqsləri qrupda professional müəllimlər komandası tərəfindən öyrədilir. "Rəqs ansamblı" fəaliyyət göstərdiyi illər ərzində müxtəlif ölkələrdə qastrol səfərlərində olub, bir çox müsabiqələrdə iştirak edib. Bu müsabiqələrdə kollektiv dəfələrlə müxtəlif mükafatlarla təltif edilib, o cümlədən festivalların laureatı kimi adlara layiq görülüb.

Bacarıqlı Əllər Rəsm Kollektivi

Uşaqların dünya görüşünün artmasında, onların zövqünün formalaşmasında iştirak edən kollektivlərdən biri də “Bacarıqlı Əllər” adlı rəsm dərnəyidir. Burada gənc rəssamlar sənətin incəlikləri ilə yaxından tanış olurlar. 2012-ci ildən bu günə qədər “Bacarıqlı əllər” rəsm kollektivi müxtəlif sərgilərdə iştiark edib, mükafatlarla təltif olunublar. Azərbaycan Respublikasının Prezidenti yanında Bilik Fondu ilə birlikdə ərsəyə gəlmiş Azərbaycan xalq nağıllarından ibarət “Nağıllar” toplusunda dərs olunan illüstrasiyaların müəllifləri Azərbaycan Dövlət Uşaq Filarmoniyasının balaca rəssamları olmuşdur.
Burada uşaqlar rəssamlığın rəngkarlıq, qrafika, dekorativ tətbiqi sənəti, dizayn, vitraj, batika, modelyer-rəssam kimi növlərini dərindən mənimsəyərək öyrənirlər.

Vokal Sinfi

Dövlət Uşaq Filarmoniyasında fəaliyyət göstərən digər kollektivlərdən biri də Vokal sinfidır. Burada uşaqlar vokalın sirlərini, incəliklərini öyrənir, uşaqların musiqiyə sevgisini aşılayır. Onlar böyük həvəslə burada məşğul olurlar. Uşaqlar müxtəlif tərkiblərdə - solo, duet, trio - konsertlərdə çıxışlar edirlər. Vokal dərsləri həmçinin uşaqların səslərinin açılmasında, səhnə mədəniyyəti, nitqinin formalaşmasında olduqca əhəmiyyətlidir. Dərslər prefessional müəllimlər tərəfindən tədris olunur. Repertuarı Azərbaycan bəstəkar mahnıları ilə yanaşı avropa və qərb bəstəkarlarının əsərləri ilə də zəngindir. Burada uşaqlar sərbəst səhnə davranışları, vokal təcrübələriylə birlikdə öz daxili aləm və rəngarəng uşaq dünyalarını tamaşaçıya maraqla təqdim edirlər. Dövlət Uşaq Filarmoniyasının bütün konsert proqramlarında vokal üzrə təhsil alan balacalar da iştirak edirlər.

Uşaq xor kapellası və kiçik qrup Şəms xoru

Dövlət Uşaq Filarmoniyasının tərkibində fəaliyyət göstərən professional kollektivlərdən digərləri də “Uşaq xor kapellası” və kiçik qrup - "Şəms" uşaq xorudur. Uşaq Xor Kapellası rəngarəng repertuarı ilə hər zaman nəyinki ölkəmizdə eləcə də ölkəmizdən kənarda layiqincə ölkəmizi təmsil etmişdir. Uşaq Xor Kapellası və “Şəms” uşaq xorunun repertuarına Azərbaycan xalq mahnıları, bəstəkar mahnıları, eləcə də dünya xalqlarının və bəstəkarlarının mahnıları – rus, alman və ingilis dillərində mahnılar daxildir. Burada onlar Azərbaycan və Avropa musiqisi ilə dərindən tanış olur, bilik və bacarıqlarını artırırlar. Bundan əlavə, burada uşaqlar səhnə mədəniyyəti qaydalarını öyrənir, vokal imkanlarını genişləndirir, həmçinin tələffüz aparatlarını inkişaf etdirirlər. Onuda qeyd edək ki, xorda ifa etmək onların davranışlarına da öz müsbət təsirini göstərir, dünya görüşlərini artırır. “Uşaq xor kapellası” və “Şəms” uşaq xoru müxtəlif dövlət tədbirlərində də uğurla iştirak etmişdirlər. Onlardan “Bakı-2015” ilk Avropa Oyunları, 2016-cı il Folmula – 1 yarışlarının açılış mərasimi, 2017-ci il Bakı İslam Həmrəyliyi Oyunlarının açılış mərasimi və s. adlarını çəkmək olar.

Sədəf" Xalq Çalqı Alətləri ansamblı

Dövlət Uşaq Filarmoniyasının "Sədəf" xalq çalqı alətləri ansamblı Filarmoniya yarandığı ildən fəaliyyət göstərir. Ansambla Bakının müxtəlif musiqi məktəblərindən şagirdlər həvəslə maraq göstərir və ansamblın fəaliyyətində yaxından iştirak edirlər. Burda onlar muğam aləminin sirləri, xalq mahnılarının tarixi, ifa üsulunu dərindən öyrənirlər. Ansamblın solistləri dəfələrlə beynəlxalq müsabiqə və festivallarda uğurla Azərbaycan milli musiqisini təmsil ediblər. Ansamblın repertuarı Azərbaycan xalq mahnıları, muğamlar, təsniflər, muğam rəngləri, bəstəkar mahnıları ilə zəngindir.

Uşaq - Gənclər Xalq Çalğı Alətləri orkestrı

Uşaq-Gənclər Xalq Çalğı Alətləri orkestrı ilk dəfə Azərbaycanın birinci xanımı, UNECKO, ISSESCO-nun xoşməramlı səfiri, Heydər Əliyev Fondunun prezidenti Mehriban Əliyevanın təşəbbüsü ilə yaranan orkestr artıq 8 ildir ki, Dövlət Uşaq Filarmoniyasında fəaliyyət göstərir. Orkestrin solistləri istedadlı gənclər, beynəlxalq müsabiqələr laureatı və prezident təqaüdçüləridir. Orkestr hər zaman zəngin repertuarı ilə seçilir. Orkestrin bədii rəhbəri və dirijoru isə Azərbaycan Respublikasının Xalq artisti Ağaverdi Paşayevdir. Orkestrda Bakının müxtəlif musiqi məktəblərindən şagirdlər həvəslə iştirak edirlər. Həmçinin orkestr müxtəlif dövlət tədbirlərində - mədəniyyət nazirliyinin təşkil etdiyi tədbirlərdə, bəstəkarların yaradıcılıq gecələrində uğurlu çıxışlar ediblər.

Kamera ansamblı

“Kamera” ansamblı Azərbaycan Dövlət Uşaq Filarmoniyasının nəzdində 2012-ci ildən fəaliyyət göstərir. Ansambl klassik simli alətlərdən ibarətdir. Şəhərimizin müxtəlif musiqi məktəblərinin şagirdləri burada böyük həvəslə məşğul olurlar. Repertuarı olduqca zəngin olan ansambl müxtəlif konsert və tədbirlərdə uğurla iştirak edirlər.